Chapter 271

ब्रह्मणाभिहितं पूर्वं यावन्मात्रं मरीचये

brahmaṇābhihitaṃ pūrvaṃ yāvanmātraṃ marīcaye

लक्षार्धाद्धन्तु तद्ब्राह्मं लिखित्वा सम्प्रदापयेत्

lakṣārdhāddhantu tadbrāhmaṃ likhitvā sampradāpayet

वैशाख्याम्पौर्णमास्याञ्च स्वर्गार्थी जलधेनुमत्

vaiśākhyāmpaurṇamāsyāñca svargārthī jaladhenumat

पाद्मं द्वादशसाहस्रं द्यैष्ठे दद्याच्च धेनुमत्

pādmaṃ dvādaśasāhasraṃ dyaiṣṭhe dadyācca dhenumat

वराहकल्पवृत्तान्तमधिकृत्य पराशरः

varāhakalpavṛttāntamadhikṛtya parāśaraḥ

त्रयोविंशतिसाहस्रं वैष्णवं प्राह चार्पयेत्

trayoviṃśatisāhasraṃ vaiṣṇavaṃ prāha cārpayet

जलधेनुमदाषाढ्यां विष्णोः पदमवाप्नुयात्

jaladhenumadāṣāḍhyāṃ viṣṇoḥ padamavāpnuyāt

चतुर्दशसहस्राणि वायवीयं हरिप्रियं

caturdaśasahasrāṇi vāyavīyaṃ haripriyaṃ

श्वेतकल्पप्रसङ्गेन धर्मान् वायुरिहाब्रवीत्

śvetakalpaprasaṅgena dharmān vāyurihābravīt

दद्याल्लिखित्वा तद्विप्रे श्रावण्यां गुडधेनुमत्

dadyāllikhitvā tadvipre śrāvaṇyāṃ guḍadhenumat

यत्राधिकृत्य गायत्रीं कीर्त्यते धर्मविस्तरः

yatrādhikṛtya gāyatrīṃ kīrtyate dharmavistaraḥ

वृत्रासुरबधोपेतं तद्भागवतमुच्यते

vṛtrāsurabadhopetaṃ tadbhāgavatamucyate

सारस्वतस्त कल्पस्य प्रोष्ठपद्यान्तु तद्ददेत्

sārasvatasta kalpasya proṣṭhapadyāntu taddadet

अष्टादशसहस्राणि हेमसिंहसमन्वितं

aṣṭādaśasahasrāṇi hemasiṃhasamanvitaṃ

यत्राह नारदो धर्मान् वृहत्कल्पाश्रितानिहं

yatrāha nārado dharmān vṛhatkalpāśritānihaṃ

पञ्चविंशसहस्राणि नारदीयं तदुच्यते

pañcaviṃśasahasrāṇi nāradīyaṃ taducyate

सधेनुञ्चाश्विने दद्यात्सिद्धिमात्यन्तिकीं लभेत्

sadhenuñcāśvine dadyātsiddhimātyantikīṃ labhet

यत्राधिकृत्य शत्रूनान्धर्माधर्मविचारणा

yatrādhikṛtya śatrūnāndharmādharmavicāraṇā

कार्त्तिक्यां नवसाहस्रं मार्कण्डेयमथार्पयेत्

kārttikyāṃ navasāhasraṃ mārkaṇḍeyamathārpayet

अग्निना यद्वशिष्ठाय प्रोक्तञ्चाग्नेयमेव तत्

agninā yadvaśiṣṭhāya proktañcāgneyameva tat

लिखित्वा पुस्तकं दद्यान्मार्गशीर्ष्यां स सर्वदः

likhitvā pustakaṃ dadyānmārgaśīrṣyāṃ sa sarvadaḥ

द्वादशैव सहस्राणि सर्वविद्यावबोधनं

dvādaśaiva sahasrāṇi sarvavidyāvabodhanaṃ

चतुर्दशसहस्राणि भविष्यं सूर्यसम्भवं

caturdaśasahasrāṇi bhaviṣyaṃ sūryasambhavaṃ

भवस्तु मनवे प्राह दद्यात् पौष्यां गुडादिमत्

bhavastu manave prāha dadyāt pauṣyāṃ guḍādimat

सावर्णिना नारदाय ब्रह्मवैवर्तमीरितं

sāvarṇinā nāradāya brahmavaivartamīritaṃ

रथान्तरस्य वृत्तान्तमष्टादशसहस्रकं

rathāntarasya vṛttāntamaṣṭādaśasahasrakaṃ

माघ्यान्दद्याद्वराहस्य चरितं ब्रह्मलोकभाक्

māghyāndadyādvarāhasya caritaṃ brahmalokabhāk

यत्रग्निलिङ्गमध्यस्थो धर्मान्प्राह महेश्वरः

yatragniliṅgamadhyastho dharmānprāha maheśvaraḥ

आग्नेयकल्पे तल्लिङ्गमेकादशसहस्रकम्

āgneyakalpe talliṅgamekādaśasahasrakam

तद्दत्वा शिवमाप्नोति फाल्गुन्यां तिलधेनुमत्

taddatvā śivamāpnoti phālgunyāṃ tiladhenumat

चतुर्दशसहस्राणि वाराहं विष्णुणेरितम्

caturdaśasahasrāṇi vārāhaṃ viṣṇuṇeritam

भूमौ वराहचरितं मानवस्य प्रवृत्तितः

bhūmau varāhacaritaṃ mānavasya pravṛttitaḥ

सहेमगरुडञ्चैत्र्यां पदमाप्नोति वैष्णवम्

sahemagaruḍañcaitryāṃ padamāpnoti vaiṣṇavam

चतुरशीतिसाहस्रं स्कान्दं स्कन्देरितं महत्

caturaśītisāhasraṃ skāndaṃ skanderitaṃ mahat

अधिकृत्य सधर्मांश् च कल्पे तत्पुरुषे ऽर्पयेत्

adhikṛtya sadharmāṃś ca kalpe tatpuruṣe 'rpayet

वामनं दशसाहस्रं धौमकल्पे हरेः कथां

vāmanaṃ daśasāhasraṃ dhaumakalpe hareḥ kathāṃ

दद्यात् शरदि विषुवे धर्मार्थादिनिबोधनम्

dadyāt śaradi viṣuve dharmārthādinibodhanam

कूर्मञ्चाष्टसहस्रञ्च कूर्मोक्तञ्च रसातले

kūrmañcāṣṭasahasrañca kūrmoktañca rasātale

इन्द्रद्युम्नप्रसङ्गेन दद्यात्तद्धेमकूर्मवत्

indradyumnaprasaṅgena dadyāttaddhemakūrmavat

त्रयोदशसहस्राणि मात्स्यं कल्पादितो ऽब्रवीत्

trayodaśasahasrāṇi mātsyaṃ kalpādito 'bravīt

मत्स्यो हि मनवे दद्याद्विषुवे हेममत्स्यवत्

matsyo hi manave dadyādviṣuve hemamatsyavat

गारुडञ्चाष्टसाहस्रं विष्णूक्तन्तार्क्षकल्पके

gāruḍañcāṣṭasāhasraṃ viṣṇūktantārkṣakalpake

विश्वाण्डाद्गरुडोत्पत्तिं तद्दद्याद्धेमहंसवत्

viśvāṇḍādgaruḍotpattiṃ taddadyāddhemahaṃsavat

ब्रह्मा ब्रह्माण्डमाहात्म्यमधिकृत्याब्रबीत्तु यत्

brahmā brahmāṇḍamāhātmyamadhikṛtyābrabīttu yat

तच्च द्वादशसाहस्रं ब्रह्माण्डं तद्द्विजे ऽर्पयेत्

tacca dvādaśasāhasraṃ brahmāṇḍaṃ taddvije 'rpayet

भारते पर्वसमाप्तौ वस्त्रगन्धस्रगादिभिः

bhārate parvasamāptau vastragandhasragādibhiḥ

वाचकं पूजयेदादौ भोजयेत् पायसैर् द्विजान्

vācakaṃ pūjayedādau bhojayet pāyasair dvijān

गोभूग्रामसुवर्णादि दद्यात्पर्वणि पर्वणि

gobhūgrāmasuvarṇādi dadyātparvaṇi parvaṇi

समाप्ते भारते विप्रं संहितापुस्तकान्यजेत्

samāpte bhārate vipraṃ saṃhitāpustakānyajet

शुभे देशे निवेश्याथ क्षौमवस्त्रादिनावृतान्

śubhe deśe niveśyātha kṣaumavastrādināvṛtān

नरनारयणौ पूज्यौ पुस्तकाः कुसुमादिभिः

naranārayaṇau pūjyau pustakāḥ kusumādibhiḥ

गो ऽन्नभूहेम दद्वाथ भोजयित्वा क्षमापयेत्

go 'nnabhūhema dadvātha bhojayitvā kṣamāpayet

महादानानि देयानि रत्नानि विविधानि च

mahādānāni deyāni ratnāni vividhāni ca

मासकौ द्वौ त्रयश् चैव मासे मासे प्रदापयेत्

māsakau dvau trayaś caiva māse māse pradāpayet

अयनादौ श्राबकस्य दानमादौ विधीयते

ayanādau śrābakasya dānamādau vidhīyate

श्रोतृभिः सकलैः कार्यं श्रावके पूजनं द्विज

śrotṛbhiḥ sakalaiḥ kāryaṃ śrāvake pūjanaṃ dvija

इतिहासपुराणानां पुस्तकानि प्रयच्छति

itihāsapurāṇānāṃ pustakāni prayacchati

पूजयित्वायुरारोग्यं स्वर्गमोक्षमवाप्नुयात्

pūjayitvāyurārogyaṃ svargamokṣamavāpnuyāt