अथ पञ्चाशीत्यधिकशततमो ऽध्यायः
atha pañcāśītyadhikaśatatamo 'dhyāyaḥ
नवमीव्रतानि ॥
navamīvratāni ||
अग्निर् उवाच
agnir uvāca
नवमीव्रतकं वक्ष्ये भुक्तिमुक्त्यादिसिद्धिदं
navamīvratakaṃ vakṣye bhuktimuktyādisiddhidaṃ
देवी पूज्याश्विने शुक्ले गौर्याख्यानवमीव्रतं
devī pūjyāśvine śukle gauryākhyānavamīvrataṃ
पिष्टकाख्या तु नवमी पिष्टाशी देवपूजनात्
piṣṭakākhyā tu navamī piṣṭāśī devapūjanāt
अष्टम्यामाश्विने शुक्ते कन्यार्कमूलभे यदा
aṣṭamyāmāśvine śukte kanyārkamūlabhe yadā
अघार्दना सर्वदा वै महती नवमी स्मृता
aghārdanā sarvadā vai mahatī navamī smṛtā
दुर्गा तु नवगेहस्था एकागारस्थिताथवा
durgā tu navagehasthā ekāgārasthitāthavā
पूजिताष्टादशभुजा शेषाः षोडशमत्कराः
pūjitāṣṭādaśabhujā śeṣāḥ ṣoḍaśamatkarāḥ
शेषाः षोडशहस्ताः स्युरञ्जनं डमरुन्तथा
śeṣāḥ ṣoḍaśahastāḥ syurañjanaṃ ḍamaruntathā
रुद्रचण्डा प्रचण्डा च चण्डोग्रा सण्डनायिका
rudracaṇḍā pracaṇḍā ca caṇḍogrā saṇḍanāyikā
चण्डा चण्डवती पूज्या चण्डरूपातिचण्डिका
caṇḍā caṇḍavatī pūjyā caṇḍarūpāticaṇḍikā
क्रमान्मध्ये चोग्रचण्डा दुर्गा महिषमर्दिनी
kramānmadhye cogracaṇḍā durgā mahiṣamardinī
ओं दुर्गे दुर्गे रक्षणि स्वाहा दशाक्षारो मन्त्रः
oṃ durge durge rakṣaṇi svāhā daśākṣāro mantraḥ
दीर्घाकारादिमन्त्रादिर् नवनेत्रो नमो ऽन्तिकः
dīrghākārādimantrādir navanetro namo 'ntikaḥ
षड्भिः पदैर् नमःस्वधावषट्कारहृदादिकं
ṣaḍbhiḥ padair namaḥsvadhāvaṣaṭkārahṛdādikaṃ
अङ्गुष्ठादिकनिष्ठान्तं न्यस्याङ्गानि जपेच्छिवां
aṅguṣṭhādikaniṣṭhāntaṃ nyasyāṅgāni japecchivāṃ
एतञ्जपति यो गुह्यं नासौ केनापि बाध्यते
etañjapati yo guhyaṃ nāsau kenāpi bādhyate
कपालं खेटकं घण्टां दर्पणन्तर्जनीन्धनुः
kapālaṃ kheṭakaṃ ghaṇṭāṃ darpaṇantarjanīndhanuḥ
ध्वजण्डमरुकं पाशं वामहस्तेषु विभ्रतीं
dhvajaṇḍamarukaṃ pāśaṃ vāmahasteṣu vibhratīṃ
शक्तिमुद्गरशूलानि वज्रं खड्गञ्च कुन्तकं
śaktimudgaraśūlāni vajraṃ khaḍgañca kuntakaṃ
शङ्खं चक्रं शलाकां च आयुधानि च पूजयेत्
śaṅkhaṃ cakraṃ śalākāṃ ca āyudhāni ca pūjayet
पशुञ्च काली कालीति जप्त्वा खड्गेन घातयेत्
paśuñca kālī kālīti japtvā khaḍgena ghātayet
कालि कालि वज्रेश्वरि लौहदण्डायै नमः
kāli kāli vajreśvari lauhadaṇḍāyai namaḥ
तदुत्थं रुधिरं मांसं पूतनायै च नैरृते
tadutthaṃ rudhiraṃ māṃsaṃ pūtanāyai ca nairṛte
वायव्यां पापराक्षस्यै चरक्यै नम ईश्वरे
vāyavyāṃ pāparākṣasyai carakyai nama īśvare
विदारिकायै चाग्नेय्यां महाकौशिकमग्नये
vidārikāyai cāgneyyāṃ mahākauśikamagnaye
तस्याग्रतो नृपः स्नायाच्छत्रुं पिष्टमयं हरेत्
tasyāgrato nṛpaḥ snāyācchatruṃ piṣṭamayaṃ haret
दद्यात् स्कन्दविशाखाभ्यां ब्राह्माद्या निशि ता यजेत्
dadyāt skandaviśākhābhyāṃ brāhmādyā niśi tā yajet
जयन्ती मङ्गला काली भद्रकाली कपालिनी
jayantī maṅgalā kālī bhadrakālī kapālinī
दुर्गा शिवा क्षमा धात्री स्वाहा स्वधा नमो ऽस्तु ते
durgā śivā kṣamā dhātrī svāhā svadhā namo 'stu te
देवीं पञ्चामृतैः स्नाप्य पूजयेच्चार्हणादिना
devīṃ pañcāmṛtaiḥ snāpya pūjayeccārhaṇādinā
ध्वजादिरथयात्रादिबलिदानं वरादिकृत्
dhvajādirathayātrādibalidānaṃ varādikṛt
इत्य् आग्नेये महापुराणे नवमीव्रतानि नाम पञ्चाशीत्यधिकशततमो ऽध्यायः ॥
ity āgneye mahāpurāṇe navamīvratāni nāma pañcāśītyadhikaśatatamo 'dhyāyaḥ ||