Chapter 130

मण्डलानि प्रवक्ष्यामि चतुर्धा विजयाय हि

maṇḍalāni pravakṣyāmi caturdhā vijayāya hi

कृत्तिका च मघा पुष्पं पूर्वा चैव तु फल्गुनी

kṛttikā ca maghā puṣpaṃ pūrvā caiva tu phalgunī

विशाखा भरणी चैव पूर्वभाद्रपदा तथा

viśākhā bharaṇī caiva pūrvabhādrapadā tathā

आग्नेयमण्डलं भद्रे तस्य वक्ष्यामि लक्षणं

āgneyamaṇḍalaṃ bhadre tasya vakṣyāmi lakṣaṇaṃ

यद्यत्र चलते वायुर्वेष्टनं शशिसूर्ययोः

yadyatra calate vāyurveṣṭanaṃ śaśisūryayoḥ

भूमिकम्पो ऽथ निर्घातो ग्रहणं चन्द्रसूर्ययोः

bhūmikampo 'tha nirghāto grahaṇaṃ candrasūryayoḥ

धूमज्वाला दिशां दाहः केतोश् चैव प्रदर्शनं

dhūmajvālā diśāṃ dāhaḥ ketoś caiva pradarśanaṃ

रक्तवृष्टिश्चोपतापः पाषाणपतनन्तथा

raktavṛṣṭiścopatāpaḥ pāṣāṇapatanantathā

नेत्ररोगो ऽतिसारश् च अग्निश् च प्रबलो भवेत्

netrarogo 'tisāraś ca agniś ca prabalo bhavet

स्वल्पक्षीरास् तथा गावः स्वल्पपुष्पफला द्रुमाः

svalpakṣīrās tathā gāvaḥ svalpapuṣpaphalā drumāḥ

विनाशश् चैव शस्यानां स्वल्पवृष्टिं विनिर्दिशेत्

vināśaś caiva śasyānāṃ svalpavṛṣṭiṃ vinirdiśet

चातुर्वर्णाः प्रपीड्यन्ते क्षुधार्ता अखिला नराः

cāturvarṇāḥ prapīḍyante kṣudhārtā akhilā narāḥ

सैन्धवा यामुनाश् चैव गुर्जका भोजवाह्णिकाः

saindhavā yāmunāś caiva gurjakā bhojavāhṇikāḥ

जालन्धरं च काश्मीरं सप्तमञ्चोत्तरापथम्

jālandharaṃ ca kāśmīraṃ saptamañcottarāpatham

देशाश् चैते विनश्यन्ति तस्मिन्नुत्पातदर्शने

deśāś caite vinaśyanti tasminnutpātadarśane

हस्ता चित्रा मघा स्वाती मृगो वाथ पुनर्वसुः

hastā citrā maghā svātī mṛgo vātha punarvasuḥ

उत्तराफल्गुनी चैव अश्विनी च तथैव च

uttarāphalgunī caiva aśvinī ca tathaiva ca

यदात्र भवते किञ्चिद्वायव्यन्तं विनिर्दिशेत्

yadātra bhavate kiñcidvāyavyantaṃ vinirdiśet

नष्टधर्माः प्रजाः सर्वा हाहाभूता विचेतसः

naṣṭadharmāḥ prajāḥ sarvā hāhābhūtā vicetasaḥ

डाहलः कामरूपञ्च कलिङ्गः कोशलस् तथा

ḍāhalaḥ kāmarūpañca kaliṅgaḥ kośalas tathā

अयोध्या च अवन्ती च नश्यन्ते कोङ्कणान्ध्रकाः

ayodhyā ca avantī ca naśyante koṅkaṇāndhrakāḥ

अश्लेषा चैव मूलन्तु पूर्वाषाढा तथैव च

aśleṣā caiva mūlantu pūrvāṣāḍhā tathaiva ca

रेवती वारुणं ह्य् ऋक्षन्तथा भाद्रपदोत्तरा

revatī vāruṇaṃ hy ṛkṣantathā bhādrapadottarā

यदात्र चलते किञ्चिद्वारुणं तं विनिर्दिशेत्

yadātra calate kiñcidvāruṇaṃ taṃ vinirdiśet

बहुक्षीरघृता गावो बहुपुष्पफला द्रुमाः

bahukṣīraghṛtā gāvo bahupuṣpaphalā drumāḥ

आरोग्यं तत्र जायेत बहुशस्या च मेदिनी

ārogyaṃ tatra jāyeta bahuśasyā ca medinī

धान्यानि च समर्घानि सुखिक्षं पार्थिव भवेत्

dhānyāni ca samarghāni sukhikṣaṃ pārthiva bhavet

प्परस्परं नरेन्द्राणां सङ्ग्रामो दारुणो भवेत्

pparasparaṃ narendrāṇāṃ saṅgrāmo dāruṇo bhavet

ज्येष्ठा च रोहिणी चैव अनुराधा च वैष्णवम्

jyeṣṭhā ca rohiṇī caiva anurādhā ca vaiṣṇavam

धनिष्ठा चोत्तराषाढा अभिजित् सप्तमन्तथा

dhaniṣṭhā cottarāṣāḍhā abhijit saptamantathā

यदात्र शलते किञ्चिन् माहेन्द्रं तं विनिर्दिशेत्

yadātra śalate kiñcin māhendraṃ taṃ vinirdiśet

प्रजाः समुदितास्तस्मिन् सर्वरोगविवर्जिताः

prajāḥ samuditāstasmin sarvarogavivarjitāḥ

सन्धिं कुर्वन्ति राजानः सुभिक्षं पार्थिवं शुभम्

sandhiṃ kurvanti rājānaḥ subhikṣaṃ pārthivaṃ śubham

ग्रामस्तु द्विविधो ज्ञेयो मुखपुच्छकरो महान्

grāmastu dvividho jñeyo mukhapucchakaro mahān

चन्द्रो राहुस् तथादित्य एकराशौ यदि स्थितः

candro rāhus tathāditya ekarāśau yadi sthitaḥ

मुखग्रामस्तु विज्ञेयो यामित्रे पुच्छ उच्यते

mukhagrāmastu vijñeyo yāmitre puccha ucyate

भानोः पञ्चदशे ह्य् ऋक्षे यदा चरति चन्द्रमाः

bhānoḥ pañcadaśe hy ṛkṣe yadā carati candramāḥ

तिथिच्छेदे तु सम्प्राप्ते सोमग्रामं विनिर्दिशेत्

tithicchede tu samprāpte somagrāmaṃ vinirdiśet